«Փեթակ» շաբաթօրեայ դպրոցը տօնեց Հայաստանի Հանրապետութեան անկախութիւնը

21 Սեպտեմբերի, 2024 թ․, շաբաթ օր, Քալիֆորնիոյ Փասատենա քաղաքի Ս. Գրիգոր Լուսաւորիչ եկեղեցւոյ «Փեթակ» շաբաթօրեայ դպրոցն իր աշակերնտերով, ծնողներով եւ հիւրերով տօնեց Հայաստանի Հանրապետութեան անկախութեան 33 ամեակը:

Ամենամեայ այս տօնակատարութիւնը սկսաւ մանկապարտէզի սանիկներու՝ որպէս հայրենիքի փոքրիկ պաշտպաններ, համաչափ քայլերով սրահ մուտքով: Ապա բոլոր ներկաները յոտնկայս երգեցին Հայաստանի քայլերգը: Բ. դասարանի աշակերտներ Արէն, Սանահին, Նիքըլըս եւ Արեւն իրենց քաղցրիկ եւ ցնծուն ձայնով արտասանեցին «Մեր անուշիկ Հայաստան» ոտանաւորը եւ ըսին. «Սէգ սարերդ կը սիրենք / Օդդ ու ջուրդ կը սիրենք / Քաղցրիկ սիրով մանկական / Մեր անուշիկ Հայաստան»: Աւագ դասարանի երկու աշակերտուհիներ, Քէյլա եւ Օտէթ, արտասանեցին Պարոյր Սեւակի «Իմ Հայաստան» բանաստեղծութիւնը եւ վեհաձայն գոչեցին. «Իմ քաղցրանուն, / Իմ բարձրանուն, / Իմ տառապած, / Իմ փառապանծ… / Սրի պատեան, / Սիրոյ մատեան՝ / Միշտ հին ու նոր իմ Հայաստան»:

Յայտագիրն ունէր դաստիարակչական բաժին մը: Աշակերտները դիտեցին անկախութիւնը խորհրդանշող՝ բծախնդրութեամբ ընտրուած լուսանկաներ, ինչպէս անկախ Հայաստանի զինանշանը, դրոշակը, Ազգային Ժողովը եւ պետականութեան այլ նշանները, մինչ լեսցին իրենց տարիքին յարմար բացատրութիւններ: Ապա, աշակերտները բեմ բարձրացան եւ դաշնակահարուհի Էլմիրա Սիմոնեանի նուագացութեամբ երգեցին «Անուշ հայրենիք» եւ «Հայերէն երգենք» երգերը:

Յայտագիրն աւարտեցաւ Տէրունական աղօթքով:

Որպէս քաղցր հրաժեշտ՝ ներկաները վայելեցին անկախութեան թեմայով ձեւաւորուած կարկանդակէ կտոր մը:

Այս տարի WASC-ի կողմէ վարկաւորուած «Փեթակ» դպրոցը, վայելելով Արեւմտեան թեմի առաջնորդ գերաշնորհ Տ. Յովնան արք. Տէրտէրեանի օրհնութիւնը եւ հովանաւորութիւնը, բոլոր տարիքի եւ լեզուական ամէն մակարդակի հայորդիներուն կու տայ հայեցի դաստիարակութիւն: Լեզուի դասերուն զուգահեռ ան ունի թատրոնի, երգի եւ պարի յատուկ ժամեր: Դպրոցի նպատակն է, ընտանեկան ջերմ միջավայրի մէջ հայ աշակերտին ազգային եւ հոգեւոր ինքնութիւն տալ: Արձանագրութեան եւ յաւելեալ տեղեկութեան համար դիմել՝ Ս. Գրիգոր Լուսաւորիչ եկեղեցի. (626) 449-1523, կամ՝ saturdayschool@stgpas.com :

Նորայր Տատուրեան